亚单单，亚单单，一砖豆腐食三餐，乌蝇担去佢一啖，一直追到白云山。白云山有条乌肉蛇，咬死亚单两仔爷。

塘虫尾伏伏，伏在我条金丝竹。竹尾郁一郁，塘虫尾飞到田边伏，大牛细牛追到扑。细牛追唔到，起势咁哭，大牛见肚痛，要揾火筒焗。

煮饭仔仔先落米，风炉透火柴对齐，千祈唔好咁拿西，我哋唔系细蚊仔。

昨晚生下一个小娃娃，吓得一群姊妹乱如麻。走出桥头占支卦，先生话唔养亦罢。抱儿出到路三叉，“儿呀！你渴来就饮溪中水，阎王若问尔爹和妈，儿呀！你唔怕话：你话我妈深闺犹未嫁，总系爹爹名字恶稽查！”

唹女大，唹女乖，唹大女来嫁后街。嫁起后街有乜卖？又有鲜鱼鲜肉两边排，要食鲜鱼街上买，要食鹹鱼等过街。（小儿催眠曲）

老鼠仔，黑麻麻，咬烂阿婆婆个个瓜。阿婆提住你de，de，da，阿公捉住又敲牙。

老鼠仔，搅家精，跌落阿婆米仔埕。阿婆揾纸封住你，你在内头bing，bing，bing。

又哭又笑，乌蝇打醮，老虎行桥；行到桥边疴一笃大猪乸尿。

案：这首儿歌，是当小孩子哭时用来引他发笑的。

排排坐，等鱼等肉过，猫儿拐凳夫人坐，老鼠担梯嗅盒箩，嗅出一升大米糯，去归食饱两公婆。

鸡公仔，尾灣灣，做人新抱（1）實艱難，早早起身都話晏，梳光頭髻出上間（2），上間有個金瓜仔，問吓安人煮都蒸？老倌又話煮，安人又話蒸，煮熟唔中安人意，安人拍起檯头鬧三朝，打爛三枝雜木棍，跪爛九条荷惠裙，挑開头路血淋淋！

原注（1），新抱，即新媳妇也。（2）上间，即神厅。

唱只歌仔甚新鲜，灶虾曱甴契同年，又同蜘蛛借线路，又同蠄蟧借盒添，叫个舂米公公担盒过，螗虫尾问佢担去边，乌蝇拍手哈哈笑，大家唔见十几年。

打鼓仔，扒龍船，扒得快，好世界，米又平，仔又大，娶埋新抱着花鞋！

咬蔗须，要睇毛，短毛输，长毛赢，无毛唔算数。

拍大髀，唱山歌，人人话我冇老婆，嘀起心肝娶番个，有钱娶个娇娇女，冇钱娶个豆皮婆，豆皮婆，食饭食得多，疴屎疴两箩，疴尿冲大海，疴屁打铜锣。

凼凼转，菊花圆，炒米饼，糯米团。亚妈叫我睇龙船，我唔睇，睇鸡仔，鸡仔大，捉去卖。卖得几多钱？卖得三百六十五个仙。

呈沉剪，呈沉包，呈沉糯米叉烧包；老鼠唔食香口胶，要食豆沙包。

点指兵兵，点指贼贼；点着谁人做大兵，点着谁人做大贼。

估手指，要估中。边个唔中，就唔中用，裤浪底见个窿。

点虫虫，虫虫飞，飞到荔枝基。荔枝熟，摘满屋；屋满红，：伴住个细蚊公。

劈劈啪，劈劈啪，大家来打麦。麦子好，麦子多，磨面做馍馍。馍馍甜，馍馍香，从前地主吃，现在自己尝。

大眼鸡，咸鱼头，你疴屎，唔洗手。

顽童山岗打大仗，碎泥鸟弹作炮枪；嘻嘻哈哈你我赶，泮塘小子好逞强。